افضل 10 تطبيقات اندرويد 2021 مجانيه

افضل 10 تطبيقات اندرويد 2021 مجانيه

  • السبت ١٦ يناير ٢٠٢١ - ٣:٢٣ م
  • 212

1. تطبيق corona notifications

التطبيق ده بتحمله عندك على الموبايل بكل سهوله وبيبقى ليه Extension على اي متصفح انت بتستخدمه على اللاب او الكمبيوتر بتاعك .. وعن طريق اللاب ومن الـExtension دي بتقدر تشوف كل الـNotifications بتاعتك اللي على الموبايل قدامك على اللاب 

يعني لو انت في اجتماع او لو موبايلك في الشاحن وبعيد عنك .. تقدر من خلال الـExtension اللي على اللاب بتاعك او الكمبيوتر دي انك تشوف اي حاجه جايالك على الموبايل .. اي حاجه بمعنى اي حاجه !

  • تقدر تكنسل على اي مكالمه جيالك
  • تقدر تشوف اي رساله مبعوته على واتس اب او فايبر او اي برنامج
  • تقدر ترد على اي رساله مبعوته على اي ابكليشن
  • تقدر تشوف الـSMS وترد عليها

في ميزة حلوه جدًا كمان في الابلكيشن ده وهي انك تقدر ترن على موبايل من خلال الـExtension اللي عندك على اللاب توب عشان لو انت مثلًا مش لاقي موبايلك او مش عارف موبايلك راح فيهم .. تقدر تقوله Ring My Phone موبايلك هيرن من خلال الإضافة اللي على الكمبيوتر.

لتحميل Crono -Notifications 

..........

2. تطبيق Who Touched My Phone

لما تحس ان في حد بيفتش في موبايلك من وراك وعايز تعرف مين .. يبقي تحمل تطبيق Who touched my phone !

التطبيق ده بيقدر يسجل كام مره حد حاول يفتح موبايلك ومعرفش .. او لو عرف يفتح موبايلك بيقدر انه يسجل في Report او تقرير بالتاريخ والساعه .. هو فتح انهي تطبيق بالظبط بالتاريخ والوقت والثانيه .. وفوق البيعه كمان بياخدلك صوره ليه من خلال كاميرا السيلفي علشان اللي عمل كده ميعرفش ينكر.

التطبيق بيشتغل في الخلفيه ومحدش بيقدر يعرف انه شغال وبيقدر يصور ويسجل من غير ما يعمل اي قلق للي بيحاول يفتش في موبايلك وبيخليه يفضل متطمن ويلعب براحته وفي الأخر انت اللي تقدر تشوف مين اللي عمل كده.

لتحميل Who touched my phone

..........

3.تطبيق Rotation Lock Bubble

بص الموضوع ده انا شخصيًا بيعصبني .. لما اكون فتحت الـRotation بتاع الموبايل عشان مثلًا بتفرج على حاجة معينه ونسيته .. وبعد كدة مثلًا وانا نايم وجيت افتح الـWhatsApp والاقيه عمل Rotation لوحده .. وافضل اعدل الموبايل كده واقفل الروتيشن تاني .. الموضوع بيعصبني

التطبيق ده حل المشكله دي بسهوله خالص ومش هيخليك تنسى .. ببساطه بتسيب الموبايل على وضع البورتريه عادي خالص وهو الوضع اللي بنستخدمه معظم الوقت .. ولما اكون مشغل تطبيق مُعين مثلًا اليوتيوب وعايز اعمل Rotation فالوقت ده .. بقلب الموبايل وبيظهر تاب صغيره كده او كوره بدوس عليها بتخلي الموبايل يعمل Rotation ولما اخلص بدوس عليها تاني بيرجع لوضعه الطبيعي.

لتحميل Rotation Lock Bubble

..........

4. تطبيق Shake Light

محدش فينا مش بيستخدم فلاش الموبايل يوميًا كـ كشاف .. مش بس عشان التصوير .. تطبيق Shake Light هو تطبيق بكل سهوله بيفتح كشاف الموبايل بمجرد ما تهز الموبايل بإيدك .. يعني مش هتحتاج انك تفتح الموبايل وتنزل الـMenu Bar وتفتح الفلاش.

واجهة التطبيق مفيهاش رغي كتير .. هو زرار واحد عشان التطبيق يفضل شغال على موبايلك .. كل اللي انت هتعملوا إنك هتعمل Enable Shake وتقفل التطبيق .. وكده كل ما هتهز الموبايل الفلاش هينور لوحده.

شايفك ياللي بتقول مهو كده الـFlash هيفتح وانا ماشي بسرعه او بجري مثلا ! .. لأ التطبيق بيعرف إن الموبايل في جيبك ومش بيشتغل وكمان تقدر تظبط حساسية الإهتزاز يعني لو عايز هزه قويه عشان الفلاش يشتغل .. او لو عايز هزه بسيطه.

لتحميل Shake Light

..........

5. تطبيق Movavi Clips

لو في بعض الأوقات بتحتاج تعمل مونتاج بسيط سريع لفيديوهات من على موبايلك .. او تعمل مونتاج لـStory مثلًا ومش محتاجه انك تفتح الكمبيوتر او تستخدم برنامج معقد وصعب فأنصحك تستخدم Movavi Clips.

التطبيق ده عجبني جدًا الواجهة بتاعته عشان سهله .. ولو حتى عمرك ما عملت مونتاج قبل كدة .. بسهوله جدًا تقدر تفهم التطبيق بيشتغل ازاي.

إفتح التطبيق ودوس على زرار الـPlus الموجود تحت .. وإختار محتاج تعمل مونتاج لصور ولا فيديو .. وبعدها اختار الفيديوهات او الصور ودوس على زرار Start Editing.

هيقولك إختار الـAspect Ratio للفيديو يعني عايزه يكون الفيديو بالطول مثلًا عشان يناسب الـInstagram Story وهتلاقيه كاتبلك كده .. او عايزه مثلا زي فيديوهات اليوتيوب بالعرض .. اختار اللي يناسبك.

هتلاقي الفيديوهات مرصوصه ورا بعضها فالتايم لاين تحت واتعملها دمج اوتوماتيك .. وتقدر تقف على اي حته فالفيديو وتعمل Trim او قص وتكمل وتعمل Trim تاني .. وبعدها مثلًا عايز تمسح الفيديو ده بسهوله بتمسحه بإنك تشد لفوق او لتحت وهكذا.

تقدر تضيف صوت على الفيديو من خلال المكتبه المجانيه للتطبيق وتقدر تشيل صوت الفيديو الأصلي .. تقدر تعمل Rotation للفيديو براحتك .. تختار لون خلفية الفيديو، تعمل Transition بين الفيديوهات يعني التنقل يكون بشكل معين .. تقدر تسرع الفيديو او تبطأوه .. تقدر تضيف اللوجو بتاعك للفيديو او تكتب تيكست .. تقدر تعمل Filter للفيديو .. كل اللي قلت عليه ده في النسخه المجانيه.

لتحميل Movavi Clips

..........

6. Microsoft Math Solver

فكرة التطبيق ده مش جديدة .. وهي حل المسائل الرياضية من خلال تصوير المسئله بكاميرا الموبايل .. والتطبيق ده من شركة مايكروسوفت .. وعجبني بصراحه عشان بيشرحلك كل خطوه في المعادله الرياضيه إتحلت ازاي .. يعني ببساطه كإنك بتتعلم رياضه مش مجرد اله حاسبه بتطلعلك الناتج وخلاص.

كمان مش بس تصور المعادله الرياضيه .. انت ممكن تكتبها كمان من خلال تاب Draw .. تقدر تكتب انت المُعادله والتطبيق هيحل المعادله ويشرحلك اتحلت ازاي .. وبرده تقدر تكتب المعادله بالطريقه التقليديه عادي بالكيبورد من خلال تاب Type .. بصراحه تطبيق جميع ومفيده جدًا !

لتحميل Microsoft Math Solver

..........

7.تطبيق Compputer Launcher

طبعًا كُلنا عارفين تطبيقات الـLancher وهي التطبيقات اللي بتغير شكل واجهة الموبايل وشكل الأيقونات وكده .. بس التطبيق ده عجبني جدًا بصراحه .. Computer Launcher بيخلي موبايلك يتحول لـWindows 10 بالظبط بمعظم خصائص ويندوز 10 .. انا اول ما جربته قولت هيكون صعب الإستخدام .. بس لما استخدمته لقيته سهل اوي وعجبني جداً شكله علي الموبايل.

واجهة الموبايل بمجرد ما تحمل التطبيق وتشغله هتتحول لواجهة ويندوز 10 .. وStart Menu تحت تقدر منها تجيب كل التطبيقات .. وزرار  تعمل منه Search على اي حاجه عندك على الموبايل .. وتقدر تفتح رسايلك وتعمل مكالماتك بكل سهوله.

ومن اليمين تقدر تشوف التاريخ والوقت زي Windows 10 تمامًا .. وتقدر تشوف الـNotifications بتاعتك وطبعا كل الـMenus اللي بتحتاجها هتلاقيها.

التطبيق ده فيه Built-In File Manager او مدير ملفات .. يعني لما تدوس على This PC هيفتحلك موبايلك في شكل ملفات شبه الويندوز 10 بالظبط ولما تحذف حاجه هتلاقيها بره في سلة المهمات بالظبط كأنك قاعد على الـPC بتاعك .. بصراحة لذيذ جدًا والتغير مطلوب.

لتحميل Computer Launcher

..........

8. تطبيق Wallspy

تطبيق Wallspy باين من اسمه هو تطبيق Wallpapers او خلفيات للموبايل .. طبعًا جوجل بلاي مليان تطبيقات كتيره للخلفيات بس Wallspy من التطبيقات المُميزه اوي الحقيقه.

التطبيق عليه اكتر من 8000 صوره بتتحدث تقريبًا يوميًا وجودتها HD والتطبيق متقسم لكل الأقسام اللي ممكن تتخيلها .. عشان لو بتدور على خلفيات لأي حاجه بتحبها تلاقيها بسهوله.

وأكتر ميزه بحبها في التطبيق ده واللي خلاه من تطبيقات الخلفيات المفضله عندي .. هو التعديل علي الوان الصور علشان تناسب زوقك .. يعني تقدر تدخل على اي خلفيه وتدوس على Customize وتغير في الألوان براحتك .. يعني تقدر من صوره واحده تطلع عشرات الصور المختلفه.

لتحميل Wallspy

..........

9. تطبيق Notify Buddy

كتير مننا معاه موبايلات حديثه بس مفيهاش LED Notification او لمبة إشعارات .. التطبيق ده بكل بساطه بيقدر يخلي موبايلك يبقى فيه لمبة اشعارات

البرنامج كويس جدًا، بيستخدم كذا بيكسل كده في الشاشة بتاعتك بحيث ينوروا لما يجيلك إشعارات .. وانت اللي بتختار حجم لمبة الإشعارات في الشاشة الـAMOLED ومكانها ولونها والبرامج كمان اللي تخلي لمبة الاشعارات تنور .. الموضوع ممتاز بس مشكلة البرنامج ده الوحيده انه لازم الموبايل يبقى بشاشة AMOLED مينفعش شاشة IPS LCD.

وبالتالي كل موبايلات شاومي وريلمي الرخيصه اللي فيها شاشات IPS البرنامج ده مش هيشتغل عليها .. انما هيشتغل على الشاشات الاموليد زي مثلًا موبايلات سامسونج او اي موبايل بشاشة اموليد عمومًا.

لتحميل NotifyBuddy

..........

10. تطبيق Splitcloud

مين فينا معندوش الصاحب الرخم ده بتاع سمعني معاك عشان نسيت الهاند فري .. وبعدها يفضل يعدل على اختيراتك في الأغاني وينقي على مزاجه.

تطبيق SplitCloud حل المشكله دي ببساطه .. هو تطبيق Music Player تقدر تشغل اغنيتين مع بعض من خلاله .. ولما تحط الهاند فري كل سماعه هتشغل اغنيه غير التانيه .. وبكده هتخلص من صاحبك الرخم ده.

التطبيق بقى نفسه تقدر تسمع عليه معظم الأغاني تقريبًا .. يعني زي Sound Cloud بالظبط .. دور على الأغنيه اللي انت عايزها واسمعها على طول وطبعًا تقدر تسمع اي اغاني عندك على الموبايل من تاب Library او تسمع قنوات الـRadio برده من خلال التطبيق .. يعني تحس انه عشرين تطبيق في بعض .. بصراحه مفيش احسن من كده.

لتحميل SplitCloud

..........

لتحميل افضل تطبيقات

افضل تطبيقات 2021

تحميل

تحميل تطبيقات اندرويد 

تطبيقات مجانيه